Forsaga málsins var sú að þann 6. júní 2005 skipaði forsætisráðherra starfshóp sem var falið að undirbúa sameiningu matvælarannsókna hér á landi í eina stofnun. Var starfshópnum falið að undirbúa frumvarp til laga um breytingar á lögum um rannsóknir í þágu atvinnuveganna þar sem m.a. væri kveðið á um rekstrarform og stjórn sameiginlegrar matvælarannsóknastofnunar, tengsl hennar við háskólana og aðkomu samtaka atvinnulífsins að stofnuninni. Í greinargerð með frumvarpi sem síðar varð að lögum um stofnun Matvælarannsókna hf. sagði að markmið stofnunarinnar skyldi felast í að efla alþjóðlega samkeppnishæfni íslenskrar matvælaframleiðslu, stuðla að hollustu og öryggi matvæla og styðja við vísindastarfsemi háskólastofnana og sinna samfélagslegum skyldum gagnvart einstökum atvinnugreinum.