Karlaklefinn

2019

  • Hönnun og upplýsingahögun
  • Branding
  • Viðmótsforritun
  • Efnisvinnsla
  • Ritstjórn
  • Ljósmyndun
  • Markaðssetning

Karlaklefinn.is


Í karlaklefum landsins er spjallað um allt mögulegt – við settum upp einn til viðbótar

Karlaklefinn er vefur fyrir karlmenn um heilsu, forvarnir og auðvitað krabbamein: Skrifaður fyrir karlmenn og aðstandendur þeirra, lausnamiðaður og vísar óhikað á aðra vefi varðandi ítarupplýsingar.

Hugmyndin að baki Karlaklefanum var mótuð í samvinnu Hugsmiðjunnar og Krabbameinsfélagsins. Hann er hugsaður sem millistig milli átaksverkefnisins Mottumars annars vegar og stóra bróður, vefs Krabbameinsfélagsins, hins vegar.


Marserað í karlaklefanum

Karlaklefinn er ekki átaksverkefni eins og Mottumars, heldur langtímaverkefni sem ætlað er að vaxa og þróast í samstarfi við okkar mikilvægasta markhóp, karlana sem um ræðir.

Á vef Mottumars var árið 2018 var bætt við margvíslegum upplýsingum um krabbamein í blöðruhálskirtli og vefurinn varð blendingur átaksverkefnis og upplýsingaveitu. Með opnun Karlaklefans er skerpt á línum, þannig að mottumars.is snýst um átaksverkefnið en karlaklefinn.is verður lifandi upplýsingaveita.

Kynningarefni fyrir Mottumars 2019 byggir svo skemmtilegar brýr þarna á milli með því gefa innsýn inn í magnaðan karlaklefa. Auglýsingastofan Brandenburg og framleiðslufyrirtækið Republik unnu eftirminnilega sjónvarpsauglýsingu (tekna upp í næsta húsi við okkur) sem sló í gegn þegar hún var frumsýnd á lokakvöldi Söngvakeppninnar.


Viðkvæm viðfangsefni rædd án málalenginga

Algengt er að karlar séu lítið fyrir langa texta, heldur vilji komast beint að kjarna málsins og drífa í hlutum (þar sem hægt er). Það er líka þekkt að eftir áfall á borð við krabbameinsgreiningu er athyglin ekki endilega upp á sitt besta og erfitt að meðtaka mikið magn upplýsinga.

Öll efnistök Karlaklefans eiga að taka mið af þessu. Reynt er að setja fram upplýsingar um flókin viðfangsefni í eins knöppu og skýru máli og hægt er. Lögð er áhersla á að endurtaka ekki upplýsingar að óþörfu, heldur vísa í ítarefni á vef Krabbameinsfélagsins og annars staðar eftir því sem við á.

Því miður eru ekki alltaf einfaldar reddingar í boði og erfitt að svara öllum spurningum í knöppum textum. „Call to action“ textar Karlaklefans hvetja því flestir til þess að haft sé samband við Ráðgjafarþjónustu Krabbameinsfélagsins sem þjónustar krabbameinssjúklinga og aðstandendur þeirra.


Karlar segja frá

Áhrifamesta efni Karlaklefans eru frásagnir karla af reynslu sinni af krabbameini. Þeir gefa innsýn í raunveruleikann að baki krabbameinsgreiningum og segja frá áföllum sínum og sigrum.

Myndir af körlunum og sögur þeirra voru viðfangsefni magnaðrar ljósmyndasýningar sem sett var upp í Kringlunni og víða um land í tengslum við Mottumars.


Björn
Davíð
Gunnar
Þráinn
Jón Ingi
Sigurður
Sveinn
Ingimar

Safaríkar ljósmyndir

Karlaklefinn fjallar ekki bara um krabbamein, heldur líka um forvarnir og leiðir til betri almennrar heilsu.

Segja má að í þessu verkefni höfum við stigið stuttlega inn í heim glanstímarita og matreiðslubóka þegar Jóhanna hönnunarstjóri heimsótti Braga Guðmundsson matreiðslumann og tók myndir af honum töfra fram nokkra girnilega og einfalda rétti fyrir Karlaklefann.

Uppskriftirnar er að sjálfsögðu að finna í Karlaklefanum.

  • Bragi kokkur

Krabbameinsfélagið

Samfélagsvefur ársins 2017

  • Viðskiptavinur Krabbameinsfélagið

Kjarnastarfsemi Krabbameinsfélagsins er fræðsla, forvarnir og stuðningur við einstaklinga sem greinast. Auk þess að fá almenning til að styrkja félagið. Lagt var upp með að vefurinn yrði einstaklega notendavænn og auðveldur í notkun. 

 

Gus Gus

Þegar Gus Gus breytti Eldborg í næturklúbb

GusGus hélt tvenna tónleika í Eldborgarsal Hörpu í nóvember á síðasta ári. Uppselt var á báða tónleikana sem þóttu mjög vel heppnaðir. Hugsmiðjan sá um heildarskipulagningu ásamt því að sinna hugmyndavinnu, hönnun, efnisframleiðslu og markaðssetningu. Loks voru tónleikarnir teknir upp fyrir Sjónvarp Símans.

Í markaðssetningunni á tónleikunum notuðum við stafræna miðla til að fullvissa okkur um að við þyrftum ekki á auglýsingum í hefðbundnum miðlum að halda. Þannig var kostnaði haldið í lágmarki, án þess að það bitnaði á árangrinum.

Forsala á tónleikana var notuð til að skoða viðbrögð fólks áður en almenn miðasala hófst. Krafturinn í auglýsingakerfinu á Facebook var svo nýttur til að koma auglýsingum til afmarkaðs hóps og hélt það kostnaði í lágmarki. Fólk sem hafði sýnt einhvers konar áhuga á tónleikunum sá auglýsingarnar — þetta voru harðir aðdáendur, fólk sem hafði horft á myndbönd tengd tónleikunum eða fólk sem hafði hreinlega sagst ætla að mæta.

Þetta skilaði sér í tveimur uppseldum tónleikum.

Himneskt

Innblástur í átt að grænum og umhverfisvænum lífsstíl

  • Heiti verkefnis Himneskt

Mæðgurnar Solla Eiríks og Hildur eru landsmönnum löngu kunnar fyrir tilraunagleði í eldhúsinu. Ástríða þeirra fyrir matargerð, lífrænni matjurtarækt og listum hefur fundið sér farveg á þessum fallega vef.